Safar e Imam Hussain ع Marsiya
Ghar Se Jab Bahre Safar Syed-e-Aalam Nikle
Sar Jhuka-e- Huwe Ba Dida-e- Purnam Nikle
Khawash-o- Farzand Kamar Baandh Ke Baaham Nikle
Roke Farmaya Ke Is Shahar Se Ab Ham Nikle
Raat Se Girya-e- Zehra Ki Sada Aati Hae Dekhen Qismath Hame Kis Dasht Me Le Jaati Hae
Ruq Kiya Shah Ne Sue Qabr-e- Shahinshah-e- Anam
Bahre Tasleem Jhuke Muttasile Baabe Salaam
Izn Padh Kar Jo Gaye Qabr Ke Nazdeek Imam
Arz Ki Aaya Hae Aaj Aaqri Ruqsath Ko Ghulaam
Ye Makaan Ham Se Ab Aye Shah-e- Zaman Chut-tha Hae
Aaj Hazrat Ke Nawase Se Watan Chut-tha Hae
Chain Se Sab Hain Gharoun Me, Mujhe Milta Nahin Chain
Saqt Aafat Me Hai Ab Aapka Ye Noorul Ain
Tukde Dil Hota Hae Jab Roke Haram Karte Hain Bain
Nanhe Bachown Ko Bhala Leke Kahan Jaae Hussain
Shaher Me Chain Na Jangal Me Amaan Milti Hae
Dekhiye Qabr Musafir Ko Kahan Milti Hae
Ab Mere Sar Ke Liye Tez Huwe Hain Qanjar
Ahl-e- Keen Shar Pa Kamar Bandhe Hain Ya Qair-e-Bashar
Aap Ne Di Thi Isi Roz Ki Amma Ko Khabar
Waaleda Roi Thi Do Roz Talak Peet Ke Sar
Is Nawase Ko Magar Bhool Najaana Hazrat
Zibha Ke Wagt Madad Karne Ko Aana Hazrat
Ye Wo Din Hain Ke Parinde Bhi Nahin Chodhthe Ghar
Mujhko Dar Paish Hae In Rozoun Me Aafath Ka Safar
Hae Kahin Qati Ka Samaan Kahin Lutjaane Ka Dar
Saath Hae Bachown Ka Aye Baadshah-e- Jin-o-Bashar
Tang Jeene Se Hoon Paas Apne Bulalo Nana
Apni Turbat Me Nawase Ko Chupalo Nana
Ye Bayaan Karke Jo Taaweez Se Lipte Sarwar
Yun Hill Qabr Ke Tharrai Zarih-e- Anwar
Aai Turbath Se Ye Aawaz-e- Habeeb-e- Dawar
Teri Ghurbath Ke Main Sadqe Mere Mazloom Pisar
Koi Samjha Na Meri God Ka Pala Tujhko
Haae Aada Ne Madine Se Nikala Tujhko
Aye Mere Gesuoun Wale Mere Saber Shabbir
Mere Bekas Mere Mazloorn Musafir Shabbir
Na Raha Koi Tera Yawar-o- Naser Shabbir
Haae Aye Gor-e- Gharibaan Ke Mujawer Shabbir
Too Jahan Jaega Pyare Wahan Chalta Hoon Main
Khaak Udata Huwa Turbat Se Nikalta Hoon Main
Kal Din Se Teri Madar Ko Nahi Qabr Me Chain
Aai Thi Shab Ko Mere Paas Ye Karti Huwi Bain
Ghar Mera Luttha Hae Faryaad Rasoole Sagalain
Subha Ko Apna Watan Chowdh Ke Jata Hae Hussain
Kahne Aai Hoon Ke Mu Qabr Se Moudungi Mae
Apne Bacche Ko Akela To Nahi Chodhungi Mae
Sunke Ye Shah Ne Kiya Aagri Ruqsat Ka Salaam
Nikle Rote Huwe Jab Rouza-e- Anwar Se Imaam
Shah Se Usdam Ye Kiya Roro Ke Zainab Ne Kalam
Qabr Par Maa Ki Mujhe Le Chalo Ya Shah-e- Anaam
Log Hamraah Haen Mahmil Me, Mae Kyun Kar Rou- Oon
Maa Ki Turbath Se Phir Ek Baar Lipat Kar Rou- Oon
Maa Ki Turbath Pa Gaye Shaah Ba Chashm-e-Khoon Baar
Utri Mahmil Se Basad Aah-o- Fughan Zainab-e-Zaar
Doudh Kar Qabr Se Lipte Jo Imam-e- Abraar
Haath Zehra Ki Lahad Se Nikal Aae Ek Baar
Aai Aawaz Na Ro Dil Ko Qhalaq Hota Hai
Qabr Hilti Hae Kaleja Mera Shaq Hota Hai
Haan Bulaao Mera Abbas-e- Dilawar Hae Kidhar
Wo Fida Hae Mere Bache Pa Mae Sadqe Uspar
Shikam-e- Ghaer Se Go Hae, Pa Wo Mera Hae Pisar
Ye Sada Sunke Baradar Ko Pukare Sarwar
Abhi Rahwaar Ko Aage Na Badhaao Bhai
Yaad Farmati Hain Amma Idhar Aao Bhai
Aake Abbas Ne Sar Rakh Diya Paaene Mazaar
Aai Zehra Ki Sada Main Teri Ghurbat Ke Nisaar
Apne Pyaroun Ke Barabar Main Tujhe Karti Hoon Pyar
Dhyaan Bhai Ki Hifaazat Ka Rahe Aye Dildaar
Koi Ghurbat Me Use Maar Na Daale Beta
Mera Shabbir Hae Ab Tere Hawale Beta
